رمضان زمان يعنى الخير ولمه

رمضان زمان يعنى الخير ولمه البيت والعيله عالفطار والكل قاعد ادام احلى سفره مستنى المدفع والادان
يعنى اللمه فى البيوت والشوارع والقهاوى ادام التلفزيون مستنيين الرؤيه واول ما يقولوا غدا هو اول رمضان تسمع فرحه التهليل وكله يجرى يجهز للسحور
يعنى الفوانيس وفرحه العيال والزينه الورق الملونه فى الشوارع وصوتها والهوا بيهزها والفانوس الكبير بالخشب وورق السوليفان الملون احمر واصفر وازرق واخضر وفرحتنا واحنا بنعلقهم من البلكونات
رمضان زمان يعنى السحور وطبق الفول والمسحراتى واصحى يا نايم وحد الدايم رمضاااان كريم بصوت سيد مكاوى
يعنى الشعراوى قبل الفطار والنقشبندى قبل الاذان وصلاه الفجر والتراويح والقيام وختم القران
رمضان زمان يعنى مدنى الجامع متزوقه ومنوره باللمض الملونه بتاعه الافراح
يعنى الطابور عند بتاع القطايف والكنافه واحنا مركزين مع ايد الراجل وهو بيعملها وبيلفها داير مايدور وصوت ماما ” اوعى تجيب الكنافه والقطايف ناشفه ”
يعنى البلح باللبن والخشاف وقمر الدين والمكسرات وكل الخيرات ورصه الزبادى ادام المحلات
رمضان زمان يعنى الفوازير والف ليله ونيلى وشريهان وفطوطه وبكار وعمو فؤاد وبوجى وطمطم وسلاحف النينجا وفرحتنا بيهم والفطار ادام التلفزيون عشان مايفوتناش منهم حاجه
رمضان زمان يعنى اطباق الحلويات اللى طالعه نازله بين البيوت
يعنى الامساكيه وكل يوم نشوف المغرب حيدن بدرى باد ايه والامساك امتى
رمضان زمان يعنى مرحب شهر الصوم واهو جه يا ولاد ووحوى يا وحوى ويا بركه رمضان خليكى فى الدار
رمضان زمان يعنى الاحسان والموده ومفيش جار بيفطر فى بيته وجاره ماعندهوش فطار
يعنى موائد الرحمن والرحمه والخير فى كل مكان
رمضان قرب … كل سنه وانتوا طيبين



زمان وانا طفل صغير. كان

زمان وانا طفل صغير. كان في عاده كانت منتشره في رمضان.
بالذات في الريف وغالبا الصعيد. كانت العائلات بتتجمع في مكان واحد بعد التراوح. كل عيله ليها المكان الخاص بيها والمكان ده اسمه (المضيفه) وكان في شيخ بيقرأ قرآن ورجال العيله يقعدوا يسمعوا القرآن. وطبعا بيكون في حد بيعمل مشروبات والاطفال يلعبوا ويفرحوا. ويسمعوا قرآن. والعيله كلها تشوف بعضها. المشغول بقاله سنه او اقل ماشفش ابن عمه او قريبه في العيله من بعيد يشوفه. اطفال العيله يتعرفوا علي بعض ويعملوا صداقات.
حاجه كده
تخليك تستني رمضان من السنه للسنه.
دي بقي كان اسمها
#سهرة_رمضان
انا رمضاني كان كده
مين رمضانه كان زيي؟
#رمضان_بتاع_زمان